Устудьуоннар хайдах сессияҕа бэлэмнэнэллэрий?

Сессия — диэн хас биирдии устудьуон билэр тыла уонна эппиэтинэстээх кэмэ. Сессия сылга иккитэ буолар: Саҥа Дьыл иннинэ уонна сайын саҕана, үөрэх симиэстэрин бүтүүтэ. Билигин сайыҥҥы сессия кэмэ кэллэ.

Онно тирээн мин ХИФУ араас куурустарын, институттарын уонна факультеттарын устудьуоннарыттан кинилэр хайдах сессияҕа бэлэмнэнэ сылдьалларын, туох ньыманы тутталларын туһунан интервью ыллым.

Хомподоева Сайаана, мед.институт:
«Мин бу буолаары турар сессиябар күүскэ бэлэмнэнэ сылдьабын, долгуйабын аҕай. Ыарахан баҕайы предметтарга эксээмэннэрдээх буоламмын эрдэттэн бэлэмнэнэбин. Холобур, тылынан көмүскээһин, эбэтэр доклад оҥорон, коспект туттаран, тесты толорон эксээмэн, эбэтэр зачет ылаҕын.

Ханнык баҕарар сессияҕа мин араас ньымалары туттабын:
– эрдэттэн бэлэмнэнэбин
– барытын ааҕабын уонна хатылыыбын
– сатаабат эбэтэр ыарархаттарар суоттарбын оҥоробун
– уоскуйа, эксээмин туһунан умна сатыыбын

Бу быраабылалары тутуһан мин эксээмэннэрим чэпчэкитик уонна наһаа киһи санаарҕаабатын курдук ааһар».

Новгородов Яша, ИТИ:

«Олоххо араас буолар, сессия кэмигэр кытта. Ол курдук, бу былырыыҥҥы сессияҕа мин биир эксээмэммэр биирида билиэти үөрэппэккэ тиийбитим, ол эрээри үчүгэйдик туттарбытым. Бу курдук көрүдьүөс түгэннэр буолааччылар. Онтон быйылгы сессия саҕана мин доҕотторбун чугас дьүөгэбин кытта билиһиннэрдим. Онтон сессиям чэпчэкитик ааһыа диэн билэбин”

Бу курдук, устудьуоннарбыт араас-араастык сессиялара ааһар. Ол эрээри бары син биир долгуйабыт, кыһаллабыт уонна бэлэмнэнэбит. Бу иһэр сессияҕыт чэпчэкитик аастын уонна сайыҥҥытын үөрэ-көтө көрсүн!

Надя ПОСЕЛЬСКАЯ